मक्याचे पराठे / sweet corn paratha

साहित्य-

१. स्वीट कॉर्न २

२. बटाटा १

३. लिंबू अर्धे

४. हळद पाव चमचा

५. आले एक छोटा तुकडा

६. मिरच्या ५-६

७. कोथिंबीर अर्धी वाटी

८. कणिक ४ वाट्या

९. तेल अर्धी वाटी

१०. मीठ चवीनुसार

११. कांदे २

१२. बटर ५ चमचे

कृती-

प्रथम कुकर लावण्यासाठी दोन्ही कणसे मधून तोडून कुकरच्या भांड्यात टाकावी. सोबत बटाट्याचे २ तुकडे करून टाकावे. ३ शिट्या झाल्यावर gas बंद करावा. मग कणसाचे दाणे काढावे. बटाटा सोलून घ्यावा. मिक्सरच्या भांड्यात कणसाचे दाणे, मिरच्या, आले टाकून बारीक वाटून घ्यावे. एका कढईत २ चमचे तेल गरम करून बारीक चिरलेला कांदा तेलात शिजवून घ्यावा. आता त्यात हळद, वाटलेले मिश्रण, कुस्करलेला बटाटा, मीठ टाकून थोडेसे परतावे. २ मिनिटाने gas बंद करून चिरलेली कोथिंबीर व लिंबाचा रस टाकून मिश्रण थंड होऊ द्यावे. कणकेत मीठ टाकून पाण्याने मऊसर भिजवून घ्यावी. १ चमचा तेल लावून थोडेसे मळावे. आता कणकेचा थोडा मोठा गोळा घेऊन त्याची पारी करून त्यात सारण भरावे. व गोळा बंद करून पराठ्याला पीठ लावून जाडसर लाटुन घ्यावे. आता एका तव्यावर दोन्ही बाजूने तेल सोडून खरपूस भाजून गरम गरम बटर बरोबर सर्व्ह करावे.